TIEMPE 'E NATALE (127)

Nu presebbio fatt'in casa
tutto suvere e vammace
cu 'e pasture 'e terracotta
e cu 'o Ninno dint''a rotta!
Po' 'n'abete prufumato
chin''e palle culurate
ciente luce 'ntermittente
e nu sacco 'e fil'argiento!
Dint''o cesto fatt''e paglia
sta 'o... Bambino di famiglia,
sta cuccato int''a vammace
cu chill'uocchie chine 'e pace!
'O camino abbrucia 'o ligno,
tutt''a casa addora 'e pigne,
spanne attuorno nu calore
ca 'nce fa' rallegra' 'e core!
E' Natale 'ncopp''a terra,
addo' sta 'a pace
e addo' sta 'a guerra,
e si 'a ggente foss'onesta
tutt''o munno stesse 'n festa!...

Alberto Iannuzzi 26.11.1993