'A PUISIA (116)

Steve 'ammontamare
a guarda' 'o mare e 'o cielo
cu 'e gabbiane ca vulavano
e scennevano 'n picchiata
'ncopp''all'onne;
'a museca d''o sciacquettìo d''o mare
ca faceva 'a sottofondo,
'e strille 'e 'st'aucielle
pe' richiamo, e,
...penzavo a te!
E 'ncapa me girava 'na puisia,
e, sempe chella
me turnava 'int''o penziero,
disturbanneme 'o penziero 'e te.
Cercavo 'na penna
e nu poch''e carta p''a scrivere
e pe' nun m''a scurda',
ma ... niente;
allora l'agge scritta
'nterr''a rena, pettramente
ca truvave l'occorrente,
e quanno so' turnato
nun l'agge cchiù truvata:
nu cavallone se l'era arrubbata
e se l'era purtata 'nfunn''o mare
vicino a tutt''e suonne mieie
ca nun se so' avverate mai!...
Ma si 'nce penzo buone m'arricordo:
'o titolo se chiammava "ammore"
e 'a puisia diceva:
"nenné,
te voglio bbene!"

Alberto Iannuzzi 09.12.2009