NIENTE (108)

Pe' se gustà 'o meglio
d'ogni cosa,
nu poco, certo, s''adda paté!
Pe' te piglia' 'a mengula
'a dint''o cunfetto,
o te l'e zuca',
o te l'e ruseca'!
Pe' te gudé 'e 'na rosa
'o prefumo e 'a bellezza soia,
senza meno t'he' st'attiento 'e spine!
Pe' te recrià c''o ddoce 'e 'na cerasa,
t'he' st''attiento all'uosso!
Niente è facile,
pecché niente te da' niente
pe' senza niente!
'A vita è peggio ancora:
pe' te gudé 'na bella jurnata,
chissà pe' quantu tiempo
tu 'e 'a paté!
Pe' nu mumento 'e pace,
'na jurnata sana e' 'a fatecà!
Pe' nu muorzo 'e felicità
chissà pe' quantu tiempo
tu e' 'a suffrì!
Ma è accussì bello
a se gustà 'a mengula
'a dint''o cunfetto,
'o ddoce 'e 'na cerasa,
e a sentì 'o prefumo 'e 'na rosa,
a te gudé nu mument''e pace,
'na bella jurnata
o nu muorzo 'e felicità,
ca nun pienze
a chello che 'e 'a passà,
'o tuosto ca t'he 'a rusecà,
'o tuosseco che te 'a pigli°
pecché 'ossaje gia'
ca niente te dà niente,
pe' senza niente!

Alberto Iannuzzi 04.11.2002