'O matrimonio
è 'na tavula 'mbandita,
pozz'esse' fatta
cu ddoie tavule 'e ponte,
nu mesale a quadrune
de cuttone,
'e piatt''e stagno
'e bbecchiere 'e carta.....
oppure fatta cu
'na tuvaglia arricamata,
tuvagliuole 'e lino cu 'o merletto,
pusat'argiento,
bicchiere 'e cristalle fino,
piatt''e purcellana bavarese,
sciure, sciurille
e segnanomm'argiento!...
Ma, 'a tavula 'mbandita
senza niente pe' magna',
è comm''o matrimonio
senz'ammore!
Purtamme 'a tavula
tutte ll'asciute
a partì d'aperitivo
cu 'e stuzzichine
e pe' fernì cu
dorce, ggelato,
vino e champagne.
L'ammore
e tutto chello ca cumporta,
so' tutt''e ppurtate
'e 'st'abbuffata!...
E, ...il sesso?
No, il sesso
nunn'è 'na purtata
specifica e particulare,
Il sesso è 'o ssale,
sta 'int'a tutt''e piatte
...ammesurato,
iusto pe' da' sapore
a ogni purtata!...
Alberto Iannuzzi 27.09.2002
Nessun commento:
Posta un commento