'O CAMPUSANTO MIO (115)

Fa' visite 'o campusanto
nunn'è 'n'abbitudine d''a mia;
nce vache raramente
ma, no pe' mancanza
d'affetto o devozzione,
ma sule pecché
m''e sente cchiù vicine
quanno stongo p''a via,
ca quanno vaco 'a casa lloro!
Iennele a truva'
me pare 'e fa'
'na viseta 'e curtesìa,
ma si m''e voglie tené vicini,
abbasta ca 'e penzo
e loro stanne cu mme!
Dint''a 'na vetrina
'a casa mia,
tenghe nu calice 'e cristallo
ca m''anno rialato
quanno me so' 'nzurato;
llà dinto ce tenghe
sule scardule 'e marmulo:
ognuna 'e chella
cu nu nomme e cu 'na data,
ognuna 'e chella
pigliata 'a vicin''o lietto
d''a casa lloro.
Si agge scivete d''e mettere
dint''a 'stu calice 'e cristalle,
'o pecché o ssaje?
...pecché è peccerillo
e Dio sa comm'io vulesse
ca nun se regnesse mai!...

Alberto Iannuzzi 05.04.2003