Surriento primma e doppo! (36)

Surriento comm'era,
e Surriento comm'è!
Che granda differenza
tra 'na città comm'è
e comm'era tant'anne fa'!
'O traffico p''a via,
palazze 'n quantità,
turiste a meliune,
alberghe a zeffunnà!
'A vita scellerata,
'a corza p'arrevà,
'e vvie annure e anonime
e guaie 'n quantità!
Che fin''a fatto
'o pprefumo d''e zzagare p''a via,
'o culore d''e ciure,
'e ciardine d'arance,
'a ggenta bbona,
'e turiste cu 'e meliune,
'e strade prefumate,
'e ccase allère
e 'a ggenta rispettata?
...
Surriento comm'è
e Surriento comm'era!
Nun ce vulesse assaie
pe' turnà arrèta,
pe' fa' turnà Surriento
comm''a 'na vota:
abbastasse sulo
ca fossemo cchiù uommene
nuje Surrentine!..

Alberto Iannuzzi 23.11.1993