'O FUMMO (12)

'O fummo 'e 'na pippa,
'o fummo 'e nu sicario
se spanne pe' l'aria
e te fa recria'!
Dint''a stanza sulagna
sott''o cielo se stagna
chistu fumm''e tabbacco
ca te fa cunzula';
'a figura ch'appare
te tene cumpagnìa,
fa vula' 'a fantasia
e tene fore 'a pecundria...
'Sta pipparella mia
me tene cumpagnìa,
me sente meno sulo
e me fa resta' scetato,
me fa vede' figure
ca songh''e fantasìa
e, cu 'o fummo essa vola
e me fa viaggia' luntano,
p''e terre bell'assaie
p''e campagne assulate,
p''e muntagne annevate,
p''e poste semp'amate!...
......
insomma,
nu poch''e fummo
me fa sunna' ...scetato!...


Alberto Iannuzzi 17.09.1991