L'UOGLIO (43)

Quanno nasce nu criaturo
s'appiccia 'na cannela,
e, tutte quante,
p''a lascia' appicciata
facimme 'e paraviente
p'accuppa'!
Ma, a nu mumento a n'ato
senza sape'
ne' comme, ne' quanno,
ne' ...pecche',
'na ventecata cchiù forte
riesce a d''a stuta'!
Subbeto doppo
s'appiccia 'na lanterna,
'na lanterna a uoglio,
'na lanterna
ch'adda resta' appicciata;
l'uoglio è 'a vita
'e 'sta lanterna,
ma, ...addo' se trova?
comme nce 'o putimme prucura'?
...E' cosa 'e niente,
cu 'e preghiere!
ogne penziero, ogne ricuordo,
ogne preghiera,
è 'na goccia r'uoglio
ca serve a 'sta lanterna
pe' rummane' appicciata
pe ...l'eterno!...


Alberto Iannuzzi 10.11.2002