'O SBAGLIO (33)

Stammatina,
passianno p''a via,
cammenavo chianu chiano,
verenno 'e scanzia' 'o sole,
cercavo 'o ppoco r'ombra,
asciuttanneme 'o surore
che me bbagnava 'a fronte!
...Annanze a me 'na femmena
nunn'ancora vecchia,
ma, manco 'na guagliona;
nu metr'e cinquanta 'e rrobba,
o forse meno,
'na sissantina r'anne,
o forse ppiu';
'na uttantina 'e chile
o forse piu!
'Na maglietella rossa
zucata 'nguollo,
nu cazone de cuttone
ianco e trasparente!...
M'è venuto da penza'
ca 'sta signora,
o nun s'è fatta capace
d''o pise e dell'età,
oppure stammatina
s'è sbagliata a se vesti':
invece 'e mettere
'o culo 'int''a mutanda,
s'è mise 'a mutanda
dint''o culo!...
...
Ne, signo',
vattenne 'a casa
e vatt'a cagna',
cca' gia' fa cavere,
nun ce fa disturba'!...

Alberto Iannuzzi 22.05.2002

'A CREAZZIONE II° ATTO (149-150)

Ddoie cape c'arraggionano
è 'na cosa ardita,
si po' 'sti ddoie cape
so' de 'n'ommo
e de 'na femmena,
...è 'na traggedia.
Patate',
quanne sarra'
'a fine d''o munno,
Tu, ca senza fa' niente
nun ce sai sta',
sicuramente
mettarraie 'ncantiere
'n'atu munno 'a fa'!
Cu tutta l'esperienza
ca t''e fatte,
quanne farraie
'n'ata vota 'a Creazzione,
cagnarraie quaccosa!
quanne spartarraie
'e mare d''e terre,
'e muntagne d''e burrune,
addo' nce 'o mmiette
e addo' ll'ammanche
pe' fa' 'na cosa
cchiù perfett'ancora.
Quanne po' farraie
'a femmena e l'ommo,
qualche ...variante
certo la farraje!
Fa' nu tentativo,
invece 'e fa' la donna
cu ddoie zizze
e cu una capa,
prova a dd'a fa'
cu una zizza
e cu ddoie cape!...
Sicuro sarra'
nu sfizzio 'e meno,
ma certamente
...nu cervello 'e cchiù!...

Alberto Iannuzzi 01.03.2002

IL QUADRO E LA CORNICE (028-029)

Si tu vide 'n'opera d'arte,
nu dipinto d'autore,
nu quadro bell'assaie,
p''o fa apprezza',
nci 'a mettere 'na curnicia
ca l'arricchisce
ca 'o fa pare' chhiù bello!
Si tu vide 'na bella statue 'e Capemonte
tu sciglie 'na vetrina
addo' 'st'opera d'arte
risalta e se fa bella
ancora 'e cchiù 'e chello ca è!
Si tu vide nu culo
ca fa arrapi'
'a mente 'a fantasia,
tu pe' gustarlo ancora 'e cchiù
nci 'a mettere
'a curnicia apprupriata.
Certo nunn'è facile,
vall''a cerca'
'sta curnicia adatta
a chest'opera d'arte:
Sciglie tra nu slip
e 'na coulotte,
tra nu tanga e 'na mutanda,
...ma niente te fa sunna'...
pienze, allora, a 'o perizzoma:
'na sfrenzulella
'e stoffa o de merletto
ca copre e nun copre
chellu bben''e Dio!
...
Ma mo' vedimme buono:
qual'è 'o quadro
e qual''è 'a curnicia!
pecché nun s''e mai visto
'ncopp''a terra
'o quadro 'a fora
e ...'a curnicia 'a rinto!...

Alberto Iannuzzi 24.08.1998

'A GGITA (133-134)

'Na jurnata 'e vacanza
vi' che bell'esperienza,
fino 'a fine d''e tiempe
nun ma pozze scurda'!
Accummenza 'a matina
cu 'e pariente e 'll'amice
cu 'e bagaglie e cu 'e bborze
ca nun saie comme fa'...
Po' te miette p''a via,
'a via 'e copp''a custiera,
p'arreva' fin''o mare
ca nun vire 'e veni'.
Sott''o sole cucente,
tanta ggente p''a via,
cu 'e lamiente d''e viecchie
e 'e criature int''e rrecchie!...
Doppo tanta lamiente
arrevamme 'a marina:
cerch''o posto pe' stennere
'e tuvaglie e 'e cuscine...
passe 'ncopp''e bbagnante
stise 'o sole a arrusti'
cu 'a radietta 'int''e rrecchie
e 'a gassosa a surbi'...
Finalmente truvammo
'n'angulille pe' nnuie;
Appriparo p''e poste
e me mette a durmi'!
dduje minute è arurato
'o riposo pe' mme:
'o calore pesante,
'o surore ca scenne,
'e muscune c'arronzano attuorno,
'e ccriature ca chiagneno ancora,
'e lamiente d''a ggente vicina,
nun me fanno nu poco durmi'.
Si po' penz''o ritorno
cu nu viaggio 'affrunta'
cu 'e pariente e 'll'amice,
ie me sente 'e muri'!...
...
'Na jurnata 'e vacanza,
vi' che bell'esperienza...
'n'ata vota ca pienze
'e te fa' 'na vacanza,
vacce tu, pe' ppiacere,
...ie rimango...
...dint''a terra a zappa'!...

Alberto Iannuzzi 19.09.1991

'E LLUCE (34)

Passe 'e notte p''a via,
quanta luce tu vide.
Ogni luce è 'na casa
ogni casa è 'na storia!
Ogni luce annascogne
nu melione 'e mistere;
si tu pienze nu poco
quanta fatte ce stanno:
'na luce è 'n'ammore,
'n'ata luce è 'n'inganno;
'na luce è 'na gioia,
'n'ata luce è dulore;
'na luce po' dicere vita,
'n'ata luce po' dicere morte;
'na casa accoglie 'a preghiera,
'n'ata casa porta 'a jastemma;
'na luce po' dicere famma,
'n'ata luce te mmosta 'abbundanza!...
Passe 'e notte p''a via
quanta luce tu vide,
quanta cose tu pienze...
Dint''a via tu vulisse resta',
dint''a casa nun vulisse turna',
nun putennete scegliere 'a luce,
...nun sapenne che luce
te putesse attucca'!...

Alberto Iannuzzi 16.09.1991

'A MORTE E 'A VITA (37)

Che strano modo 'e vivere tenimmo:
chine 'e prubbleme,
chine 'e penziere;
'e guerre, 'e ccrise,
'e guaie tutt''e juorne,
'e prioccupazzione,
'e tasse, 'e mal'azzione,
prubbleme 'e salute,
prubbleme 'e puliteca,
prubbleme pe' l'ecologgia,
e chi cchiù ne tene
chiù ne mette!
Assaie ce lamentamme,
ma pe' cagna' niente facimme!
Me da' quase de penza'
ca ce truvammo bbuone pure accussì!
Po' sul''a morte ce fa paura!
...che fesse ca simme,
...paura d''a morte!
e nun capimme ca stanne accussì 'e ccose
essa 'e 'a libberazzione,
certo, è 'na cosa seria,
'a morte l'avessema teme',
si, ma avessema pure tene'
paura 'e campa' 'a vita!...


Alberto Iannuzzi 15.12.1993

TUTT'EVERE UNU FASCIO (38)

L'abbitudine 'e fa'
tutt'evere unu fascio
è 'na cosa brutt'assaie,
ca nun fa capi' maie
qual'è 'o bbene
e qul'è 'o mmale!
Chi è bbuono
e chi è 'nfame!
Si perle 'e razze,
si parle 'e frate,
si parle 'e prievete,
o 'e puliticante!
Tutte so' bbuone
o tutte so' fetiente!...
e nnuie senza rispetto,
facimma zimbare e crapette
...una bulletta!...


Alberto Iannuzzi 27.02.1994

'A NOTTE E' LONGA (27)

'O dico sempe
c''aropp'a notte
vene sempe 'o juorno!
Nunn'è ca mo
s''è già aizato 'o sole,
ma 'a luna chiena
già 'a schiarato 'o scuro
e già se ved''a luce
ca sponta da levante
e già me sente 'overo
'n'atu ttanto!
Mo aspetto sulo
c''o sole saglie 'ncielo
e scarfa 'e core
'e chi ll'aspetta tanto!...
'na mmasciata ca facce
a chi sta 'o scuro
a tantu, tantu tiempo:
'A notta è longa,
...è overo!
ma arapite
'o core a 'na speranza:
essa nun po' arura'
tutta 'na vita!...


Alberto Iannuzzi 20.02.1994

'A VOCE D''O MARE (131-132)

'Na voce 'e speranza,
'na voce 'e patenza,
'na voce 'e pecundrìa,
'na voce d'allerìa.
'A voce d''o mare
'a sempe scarfate 'e core
a tutte quante:
'o piscatore ca sonna
'e rrezze chin''e pisce,
l'emigrante ca spera 'e truva'
'na vita nova 'nterr''a Merica,
'e bbagnante ca se ciaceano
'int'a chell'acqua chiara...
...che belli ricuorde d''o passato!...
Mo, a 'e tiempe d'gge,
comm'a tutt'auti ccose,
pur''o mare è cagnato,
'a vocia soia
ch'era 'a cchiù bella canzona,
pur'essa è cagnata:
è addiventata nu lamiento,
nu lamiento 'e sufferenza,
nu lamiente 'e morte!
....
chi è ca 'o fa suffri'?
chi è ca a poc'a poco 'o fa muri'?
Simme nuie!
Nuie ca senza pietà
stamm'accerenne
a chi ci 'a data 'a vita,
a chi ci 'a date 'a gloria
a chi ci 'a date 'a speranza
e 'a voglia de campa'!
Simme nuie
cu 'a cattiveria nosta
ca lle sceppammo 'a dint''o core
tutt''e tesore ca ten'astipate
'a che 'o munno è munno!
Simme nuie ca cu 'a curiosità
ca sempe ce attanaglia
vulimme scupri' tutt''e segrete
ca tene dint''o core!
....
Si avesseme nu poco de cuscienza,
nunn''o'cceressemo scagnannelo
p''o casciunetto d''a munnezza...
...
'A voce d''o mare
è addeventato sulo
...nu lamiento!...


Alberto Iannuzzi 05.08.1994

'O SPECCHIO (31)

Che viene a spia' a me
'sti ccose ca vuo' tu
cu tanta ggente ca te cunosce,
cu tanta ggente ca te vo' bbene?
Tu viene addu me ca so' nu specchio,
e, ca manco te canosco,
e spie proprio a me
ch''e fa' pe' chistu core?
Ca t'aggia di?
Te pozzo di' chello ca veco,
te pozzo di' ca si' bella,
te pozze da' pure 'na mana
pe' te fa' migliura'!
Ma ie te pozze di' sule
chello ca veco;
e nun pozzo vede' dint''a capa toia
e, ancora 'e meno
dint''o core tuio
e nun te pozzo di'
" faie accussi'! "
O si' brutta, o si' bella,
o si' nenna o si' vecchia,
senza pile 'ncopp''a lengua
chello ca veco te dico...
sa, ...io so' sule nu specchio!...


Alberto Iannuzzi 29.10.2009

'O TRIATO (26)

'A vita è tutto nu triato!
Cu 'o vattisemo
s'aiza 'o sipario,
e po' ...ogni ghiuorno
'na cummedia
o 'na traggedia,
'na farza
o 'n'operetta,
nu cuncerto
o nu cafè-chantant!
Ogne serata
se cagna 'o cupione,
'o scenario
se cagna ogne mumento,
l'atture se scagnano
'ncopp''o parcuscenico,
ma... 'o spettaculo resta!
...resta fino a quanno
'o presentatore
s'affaccia
'a dint''o sipario,
saglie 'ncopp''o parco,
fa 'n'inchino e dice:
"Signore e signori
la compagnìa tutta
ringrazia i quì presenti
per la pazienza
e per la comprenzione!
Buona nottata a tutti!"...
Po' se stutane 'e lluce,
s'acala 'o sipario,
e... buonanotte 'o sisco!...


Alberto Iannuzzi 03.08.1994

'A FESTA D''E SUONNE (41)

Carnuvale
è 'a festa d''e suonne,
ca sule pe' 'stu iuorno
se fanno realtà!
'O guaglione
ca pe' 'n'anno sano
'a sempe sunnato
d'esser 'n'eroe,
pe' chistu iuorne
'o ppote pure fa!
'O viecchio
ca pe' 'na vita sana
'a sempe sunnato
de turna' guaglione,
sulo pe' 'sta iurnata
'o pote pure fa'!
....
Ma carnuvale
arura nu iuorno,
'o suonno, invece,
...tutta 'na vita!


Alberto Iannuzzi 16.02.1993

LL'ANNE 'E CARNUVALE (45)

Festoni e balli in maschera
curiandule e mascherineç
'o viecchie se fa' guaglione,
'o ninno se fa' crisciute!
Pe' chistu bellu juorno
nisciuno ten'età!
Si t'addimannene
quant'anne niene
l'unica risposta ca vale è:
tengo ll'anne 'e carnuvale!..


Alberto Iannuzzi 16.02.1993

'A FESTA D''A MAMMA (44)

E' maggio,
'a siconda dummeneca d''o mese,
è 'a festa cchiù bella 'e tutto l'anno,
è arrivata 'a "festa della mamma"!
Che bella jurnata
tutte rose e sciure,
tanta vase e gente allera,
tanta ggioia dint''e ccase!
Ie invece passo
'na iurnata triste,
lle porto 'na rosa
nu vaso e nu penziero,
essa me guarda e nun risponne,
me guarda cu chill'uocchie chiare,
ma...nun parla,
nun dice niente,
me vede cu chist'uocchie triste,
cull'uocchie chine 'e chianto
e, ...nun dice niente!...
Me ne scengo 'a copp''o campusanto,
cu 'o passo lemme lemme,
nu nureco ca me 'nzerra 'nganne
e tanta tristezza dint''o core!...
Pe' tutto l'anno m''a sento vicina,
ma, quann'è 'sta festa,..sule tanne
me facce capace
ca nun sta cchiù cu mme
...ma sta vulanne!...


Alberto Iannuzzi 09.05.1993

DIVERTITI SE PUOI (112)

Custume e vestitine,
curiandule e stelline,
pazzìe e mascherine,
Chest''è Carnuvale!
E pe' nu juorno sano
ognuno po' sfuga',
se sforza 'e nun penza'!
Divertiti se puoi,
divertiti se vuoi,
realizza i sogni tuoi,
pecché, dimane, 'o ssaje
ritorna 'a realtà,
e si ogge nunn''o ffaje
'n'at'anno hai d'aspetta'!


Alberto Iannuzzi 16.02.1993

'A MIMOSA (49)

Per la festa della donna
s'è cercato un bel colore,
e, cercanno 'int''o ciardino
s'è truvato l'oro fino!
D''a mimosa oro splendente,
il colore più suadente,
e 'a mimosa rappresenta
chesta festa...ricorrente.
Ma che ciorta
tene 'stu ciore,
ca pe' fa' bella 'sta festa
pochi juorne 'n vita ...resta!


Alberto Iannuzzi 07.03.1993

'O MALU PENZIERO (50)

Te siente sulo e triste,
distrutto e abbandunato,
te siente 'na schifezza
vulisse sprufunna'!
He' fatto nu penziero
ca mai s'avessa fa'!..
Te dongo nu cunziglio:
schiure nu poco ll'uocchie,
guardate areto 'e spalle,
...sta chi sta peggio 'e te!
Fermate nu mumento
e conta fino a tre
e po' allucca forte:
"Io sto meglio 'e nu rre!"...


Alberto Iannuzzi 14.08.1991

'O FRUSCIA' (30)

'Na guagliona cammina p''a via,
se sente 'e sesca', nun s'avota e cammina!
Po' penza: chissa' chi è stato
ca proprio a me chist''a siscato,
senza penza' ca p''a stessa via
nce stanno centenare 'e femmene
ca sicuramente 'a stessa cosa 'anno pensato!
Ma le fa piacere, pure si fa 'a ritrosa!
...
Tu vire 'na guagliona
e liegge dint'all'uocchie suoie
ca pe' qualcuno 'a perz''e chiocche,
e subbete tu pienze,
pecché tu ggià 'a vuo' bbene,
c''a perze proprio pe' tte!
...
Doppo nu poch''e tiempo,
quann''e truvate 'e lume d''a raggione,
pienze e ripienze a tutt''o passate,
ca tutt''e chiacchier e tutt''e mmasciate
nisciuna risposta t''anno purtato
e dici a te stesso: me so' frusciàto;
'a luce dint'all'uocchie suoie
nunn'era pe' me, era pe' 'n'ato....
...
Ma tutto chesto m''a fatto bbene,
pure si era sule 'n'impressione
m''a fatte senti' 'n'ata vota guaglione,
m''a fatte penza'...
...ca pozz'ancora vule' bbene.
Me so' sbagliato ma nun so' pentuto,
agge capito ca...
...'o fruscia' fa bbene 'a saluta!...


Alberto Iannuzzi 26.10.2009

L'AMORE E'...(48)

L'amore è rinuncia,
l'amore è cieco,
l'amore è irrazionale,
l'amore è fragile,
l'amore è sofferenza,
l'amore è traditore,
l'amore è malattia,
l'amore non ragiona,
l'amore fa impazzire,
l'amore fa morire....
.....
Ma si 'stu pover'ammore
sta accussì 'nguaiato
e po' è accussì ...pericoloso,
pecché tutte 'o cercano
cu 'na voglia smaniosa?


Alberto Iannuzzi 14.08.1992

SOLITUDINE (46)

'A malatia cchiù grave
è certo 'a solitudine!
Comm'è brutto a sta' sulo,
senza 'na mugliera,
senza ninne p''a casa,
senza mamma e pate,
senza frate e ssore,
senz'amice e cunuscente!
'A vita sulagna
è sule patenza...
Ma a vvote
è meglio a sta' malate,
pecché comme se dice:
"Meglio sule
ca mal'accumpagnate!"...


Alberto Iannuzzi 15.09.1991

'A GRAZZIA (25)

Dint''a chiesa 'na matina,
'nnanze 'a statua d''a Maronna,
addenucchiata sta 'na nenna
ca guarda 'ncielo la Gran Donna!
"Nè Marì, Maronna mia
sule Tu me puo' capi':
Tu c'asciste prena
senza fa' mai peccato,
famme 'na caretà:
fa' ca facc''e peccate
senza po' asci' mai prena!"
....
A chistu punto
se vede 'a Maronna
c'allarga 'e braccia
e dice a chella donna:
"Chesta nunn'è 'na grazzia
ca puo' chiedere a me;
Pe' fa' comme vuo' Tu,
nun ce penz''a Maronna,
ca' ce adda penza' ...(ha)tu!"


Alberto Iannuzzi 07.10.1994

'A SCALATA (39)

'A vita è fatta a scale
e ognuno 'a vo' sagli';
ognuno tenta 'a scalata
p'arreva' cchiu' 'ncopp''ell'ate:
'a scalata p''a ricchezza,
'a scalata p''a putenza,
'a scalata p''a carriera,
'a scalata all'impurtanza.
ma quanno se sale,
specie p''a scala,
si nun tiene sustanza
tu puo' pure cade';
e quanne se cade
'a copp''a 'na scala
cchiù 'ncoppe se sale
cchiù 'o butto fa male!...


Alberto Iannuzzi 17.09.1991

'A VOCCA (47)

'A vocca
serve pure pe' parla',
ma tanta ggente
nunn''o vo' capi',
penza ca 'a vocca
serve sulo pe' parla'!
Si 'sti bbuone cristiane
...penzassero
primma 'e dicere,
cuntassero fino a diece
primma
'e da' ciato a 'e ttrombe,
sa' quanta guaie,
quanta bbucìe
e quanta guerre
se putessero...
...sparagna'!...


Alberto Iannuzzi 15.04.1993

'O PARLAMENTO (74)

Vi' che schifezza
'stu parlamento,
cu li ministre
e cu 'o presidente,
e po' 'e pentite
ch'anno accusato
senza riserbo
tutt''e partite.
Mo nuie d''o popolo
comm'amma fa'?
A chi amma crerere
pe' nun sbaglia'?
Forze a 'e pulitece
spuorche o pulite,
o a 'sti spiune
ca so' 'e pentite?


Alberto Iannuzzi 05.04.1993

BASTA ! (60)

Basta cu 'sti penziere triste,
basta cu 'a pecundrìa,
basta cu 'sti Ddie 'e guaie!
Addo' sta 'a ggioia,
addo' sta 'o pizz''a riso
addo' stanne ll'uocchie ridente,
addo' sta l'ora felice,
'a jurnata cuntenta,
'a gita spenzierata
cu 'a famiglia
e cu ll'amice,
addo' sta 'a voglia de campa'
cu 'o rise e cu 'a canzone,
addo' sta 'a felicita',
'a vita senza penziere
e senza guaie 'a penza'?
...Gia',
...addo' sta?...


Alberto Iannuzzi 25.12.1992

L'ETA' (59)

L'età, cos'è l'età?
L'età, certo,
nunn''è 'o specchio d''a vita!
E' sule nu marchio
ca ognuno se da'
pe' fa' 'o specchio
d''a carta d'identità.
L'età è chella
ca ognuno se sente,
s'è viecchio a vint'anne,
s'è guaglione a cient'anne!
Ddoie so' 'e ccose
pe' resta' guaglione:
penza' sempe a dimane
scurdannese d''o tiempe ca passa,
e tené 'na cumpagnìa
ca se vo' bbene,
pecché 'o core
resta guaglione
sule cu 'a speranza
e tant'ammore!...


Alberto Iannuzzi 27.01.1992

'A SCALA (54)

'A vita è comm''a scala:
se nasce e po' se sale.
Se saglie ambressa
e senza sfuorzo,
pecche' d''a ggiuventu'
'nce sta la forza;
quanno s''è arrevato 'ncoppa
e nun puo' cchiù saglì,
si' n'ommo fatto
si chine 'e forza,
si' chine 'e vita...
...
Ma mo s'accummenza 'a discesa,
se scenne cchiù ambresse
'e comme s''è sagliuto,
s'addeventa viecchie
e po'...
'n'ata vota criaturo!


Alberto Iannuzzi 27.01.1992

ANZIANO (58)

Anziano...
...ma che brutta parola!
Me pare 'n'offesa,
me da' l'impressione
ca vo' significa'
cosa passata,
triste e abbandunata.
Cagnammele nomme
a 'sti bbuone cristiane,
nun cchiù anziane,
chiammammele...guagliune,
pecché, certamente è overo
ca pure a cient'anne
'o core è criaturo!

Alberto Iannuzzi 27.01.1992

'E SEPOLCRE (63)

'O gioverì
d''a semmana Santa
nce sta l'usanza
'e cammana' p''a via
pe' visita' una pe' una
'e cchiese d''a città
pe' fa' 'e Sepolcre!
C'è chi lo fa
per pura devozione,
pecché crere
e se ferma e prega;
ma ce sta pure chi 'o ffa'
sule pe' posa:
cammina p''a via,
se guarda attuorno e rire,
se specchia 'int''e vvetrine,
cammina e se fruscia,
e chistu cca'
...fa 'o struscio!...

Alberto Iannuzzi 08.04.1993

'O PAGAMENTO (57)

'Na parola doce,
'na carezza azzeccosa,
ddoie ciance
e 'na mez'ora 'ammore,
te pavane bbuone
'na jurnata 'e surore!


Alberto Iannuzzi 18.12.1992

'A VITA E' BELLA (113)

'A vita è bella
sule si saje sunna';
'a fantasia
te fa' vedé
rose e sciure 'n quantità,
gioie e sfizzi,
ammore e bbene
a zeffunna'!
...Po' te scite
e guarde 'nfaccia
'a realtà!


Alberto Iannuzzi 18.12.1992

'O LASSATO E' PERDUTO (23)

Fa' tutte chello ca puo'
...quanno puo'!
'O passato
nun torna cchiù arreto;
chello ca nun fai ogge
forze nun puo' ffa' cchiù!
Ogge nun ce pienze,
dimane si' pentute;
ricuordate sempe
ca tutt''o lassate
è perdute!...


Alberto Iannuzzi 01.09.1991

BUROCRAZIA (56)

ASL, USL,
mierech''e famiglia,
analisi e ricette,
visite e tickett,
lastre e radiografie,
esenzione p''a farmacia,
cu risonanze e tack
se so' sfunnate pure 'e sacc;
po' se ce mette pure 'a dieta;
...nun me ne fire proprie cchiù!
Me pare c a invece 'e fa'
'e ccure pe' sta' bbuone,
facce 'e pratiche...
..p''a ruttamazzione!!


Alberto Iannuzzi 16.10.2009

'A FILA (53)

'A fila s'adda fa'
sempe e pe' tutte cose:
'a posta se fa 'a fila,
accussì 'a banca,
'a municipalità,
e finanche 'n tratturìa,
dint''a chianca e all'osteria,
all'ustrecaro e 'a panetterìa.
'A bbona crianza
ce 'mpara d'aspetta'!
Ognuno
cerca 'e fa' 'o furbo,
ver''e passa' annanze;
...tutte jamme 'e pressa,
nisciuno vo' aspetta'!
Sule 'nfaccia 'a morte
esce fore 'a crianza,
ognuno vo' aspetta',
vulesse fa' passa' annanze
a tutte ll'ate,
e vulesse
ca 'o turno suio
nunn'arrevasse mai!...


Alberto Iannuzzi 16.09.1991

'A RESATA D''O SIGNORE (151-152)

L'ata sera,
annanz'a nu becchiere 'e vino
steve assettato 'nzieme a nu Signore,
Nu Signore?... 'O Signore!
Si, ate capito bbuono,
steve cu' DDio!
e si nun me crerrite
spiatangello a Isso!...
Je 'lle dicette: "Signo',
pecché staje accussì muscio?
Tiene 'a tristezza dint'all'uocchie;
Che t'è succieso? ...o ch'adda succerere?"
"Capisce a mme - me dicette-
ero accussì cuntento
d''a fatica fatta pe' fa' 'o munno...
ma mo nun me piace cchiù!
Addo' agge sbagliato?"
"No Signo', Tu nunn''e sbagliate!
tutto è state fatte troppo bbuone,
anzi perfetto!
Pure l'ommo he' fatte perfetto,
e isso 'a capito, e 'ncapa a isso
vo' cagna' chello ch''e fatte Tu,
se crere d'esse' meglie 'e Te!"
"Beh - dicett'Isso- lassamme sta',
parlamme 'e te!
"Signo', che t'aggia dicere,
io sto' bbuone,
tenghe famiglia e fatica
e voglio cuntinua' a fateca'
pecche' voglie sta' meglio!
voglie fa' felice a mme
e a tutt''a famiglia,
voglie campa' cient'anne
cu 'e sorde e cu 'a saluta,
voglie vencere 'a sisall
e nun voglie suffrì cchiu' "
....
A bell''e bbuono
Isso se mette a rirere,
a rirere comm''a pazzo,
nun ce 'a faceva
manc''a piglia' ciato.
"Ne' Signo, che rire a ffa',
chiste so' pruggette mieje,
nunn'è 'na barzelletta! "
"No-dicett'Isso-
ie rire pecché
tu staje facenno comm''a chillo
ca va a magna' e bevere all'usterìa
e po' se fa 'o cunto
...senza 'o tavernaro!


Alberto Iannuzzi 16.10.2009

'O CCAFE' (19)

'O ccafè pe' sta' scetato,
'o ccafè pe' durmì cuièto,
'o ccafè pe' te scarfa'
'o ccafè pe' refresca'!
Cu 'o ccafè
s'accummenza 'a jurnata,
cu 'o ccafè
po' se chiure 'a magnata!
...
'O ccafè fa male 'a saluta,
chest''è overo...
ma, diteme nu poco:
che è ca nun fa' male?
Tutto fa male
si se ne fa' 'n'abbuso,
tutto fa ' bbene
si te saie ammesura'!
Quanno te vive 'na tazz''e cafè
te siente 'n'ata cosa,
te da' forza e curaggio
pe' te fa' accummenza';
te da' gusto e calore
e te fa' recria';
'o calore ca porta 'o ccafè
è nu calore... interno,
comme chille ca te po' dda'
l'abbraccio 'e 'na mamma!
'a vita senza cafè
è comm'a nu cielo senza sole
e quann'ie stongo "fore",
aro' vaie vaie,
'stu sole
...nun veco mai!...

Alberto Iannuzzi 19.12.1991

'E MEGLIE (17)

Ie penzo ca 'o Pataterno
sta appriparanno
'n'atu munn nuovo,
ca si no nun se po' spiega':
se sceglie 'e meglie
ca sarranno 'e capemaste
'e chesta vita nova!...
se sceglie 'e meglie
'e tutt''e situazzione:
'e meglie patre,
'e megli figlie,
'e megli frate,
'e megli ggiuvene,
'e megli miereche,
'e megli prufessure,
'e megli jucature
'e tutt''e sport...
...'e meglie d''e meglie
d'ogni mestiere!...
Tutte chiste ca Isso sceglie
hanna furma' 'na squadra
ch'adda juca'
'o meglie campiunato
d''o Paraviso!...
...
'Sta cosa me fa penza'
ch''a morta nunn'esiste,
e' 'o Pataterno
ch''a arraputa
..'a campagna 'acquisti!...


Alberto Iannuzzi 27.08.2002
...

L'UOGLIO (43)

Quanno nasce nu criaturo
s'appiccia 'na cannela,
e, tutte quante,
p''a lascia' appicciata
facimme 'e paraviente
p'accuppa'!
Ma, a nu mumento a n'ato
senza sape'
ne' comme, ne' quanno,
ne' ...pecche',
'na ventecata cchiù forte
riesce a d''a stuta'!
Subbeto doppo
s'appiccia 'na lanterna,
'na lanterna a uoglio,
'na lanterna
ch'adda resta' appicciata;
l'uoglio è 'a vita
'e 'sta lanterna,
ma, ...addo' se trova?
comme nce 'o putimme prucura'?
...E' cosa 'e niente,
cu 'e preghiere!
ogne penziero, ogne ricuordo,
ogne preghiera,
è 'na goccia r'uoglio
ca serve a 'sta lanterna
pe' rummane' appicciata
pe ...l'eterno!...


Alberto Iannuzzi 10.11.2002

'A SPERANZA (16)

'A speranza 'e fa' quaccosa,
'a speranza 'e fa' furtuna,
'a speranza 'e guarda' 'a luna
sule sule 'nzieme a Te!

Quanno capita 'sta ciorta,
esce sempe 'a palla corta,
quacche ccosa vene storta
e...addio! ...Mannaggia 'a morta!...


Alberto Iannuzzi 16.09.1991

DIMME TU (14)

Dimme che tiene a ffa'
'stu core 'mpietto
si po' tu ll'ause
sulo pe' te fa' bella
e pe' pumpa'
'o sanghe p''e cerevelle!
'O core serve pure pe' pumpa',
ma 'a primma cosa
'o core è 'a casa
d''a ggioia, dell'ammore
e d''a felicità,
e, nunn'è ghiusto
d''e lascia'
'mmiezo 'a 'na via
arresecanno
ca se perdeno
e nun ponne cchiù turna'!


Alberto Iannuzzi 17.07.2009

'O RIALO A PAPA' (20)

'O diciannove 'e marzo
è 'a festa del papà,
pe' chesta gran giornata
(ch'è giorno assai speciale),
vurrìa nu gran rialo,
nu dono eccezziunale,
ca nunn'è cosa 'e pazze:
sulo pe' 'sta jurnata
..nun me scassate 'o cazzo!..

Alberto Iannuzzi 19.03.1993

PO' PASSA(52)

No, nun vogl'esse' cumpatito,
vuless'esser' capito;
Tu nun saie mo che me passa
p''a cervella a 'stu mumento,
cu 'abbesuogno ca turmenta,
'e penziere cchiù tremende...
Ma se tratta 'e nu mumento,
nu periodo fetente,
ma,...po' passa!..
Tutt''a vita accussì
certamente nun po' ghì!
Turnarranno 'e tiempe belle,
cu 'e pazzìe e cu 'e reselle;
basta cu 'sti nierve tese,
basta cu 'sti facce appese!...

Alberto Iannuzzi 24.04.1993

'N'AMICA TRISTE (51)

Nenné m'e crerere
sacce che stai passanno
e sacce Tu ch'e passato!
Nu cumpagno ca soffre
è 'na brutta esperienza,
è cchiù brutto
'e 'na mala patenza!
Mo, 'o cchiù brutto è passato,
ma 'e turmiente
nun so'fernute,
...e nun fernesceno pe' mo!
Nun te rammarica',
tutto s'acconcia;
'o tiempo po' sana'
'e fferite chiù fute.
'o Pataterno
è grande e bbuono,
e, comme se dice:
...se chiure 'na porta
e s'arape nu purtone!

Alberto Iannuzzi 09.02.1992

'O REFERENDUM (75)

No, Si, No,
Si, No, Si,
annanze accussì
certo nun se pò ghì!
'E pulitece vonne leva'
'e ccastagne d''o ffuoco
cu 'e mmane noste
pe' nun s'abbrucia',
chiammannece a buta'!
Vutanne o SI,
dici ca è NO;
Vutanne 'o NO,
dici ca è SI!
Tu puote scegliere
chello ca vuo',
ma 'a primma cosa è
...ca niente
tu ci 'a capi' !...

Alberto Iannuzzi 08.04.1993

PASCA PAGANA (67)

L'uovo 'e Pasca,
'o casatiello,
'a pastiera
e 'o crapettiello!
A chesto s'è arridotta
'a Pasca mo!
Nisciuno penza cchiù
cu' devozzione
che vvo' dicere 'sta festa
p''a religgione!
nisciuno penza cchiù,
manco pe' 'n'ora
ca ogge è risuscitato
nostro Signore!...

Alberto Iannuzzi 10.04.1993

LA FESTA DELLA DONNA (73)

L'otto marzo d'ogni anno
c'è la festa della donna,
ma che fa chesta...madonna
pe' tene' 'stu grand'onore?
Che se fa pe' chesta Santa
ch'ogni juorno tir'annanze
cu fatiche e cu patenze
p'ave' nu poco 'e cumpiacenza?
Chistu juorno nuie Le damme
tant'aurie e 'na mimosa;
ma che fosse si pe' 'n'anno
nuie Lle dessemo ogn'altra cosa?

Alberto Iannuzzi 03.03.1993

SAN GIUSEPPE (72)

'o mese 'e marzo,
'e diciannove,
cade 'a festa
'e San Giuseppe:
l'artigiano
maste d'ascia
padre
d''o nennillo 'n fasce;
chistu masto
rappresenta
'o papà
pe l'eccellenza.
ogni ninno,
'e chistu juorno
va add''o patre
e fa ll'aurie
de salute
e de bontà
per la festa del papà!


Alberto Iannuzzi 01.03.1993

19 MARZO (71)

'Na sveglia speciale,
'na canzuncella doce,
'nu vase e 'na puisìa,
nu scatolo 'e bon-bon!
nu juorno bell'assaie
cu 'o ddoce e cu ll'ammore
cu 'o bene e cu ll'aurio
'e salute e sazzietà.
No, nunn'è nu suonno,
è pura realtà:
è 'o diciannove 'e marzo,
'a festa del papà!

'A FESTA DEL PAPA' (70)

Pe' chistu juorno
s'appripara 'o trono
p''o rre d''a casa,
'o capo d''a famiglia;
ll'aurie d''a mugliera,
l'abbracce d''e figlie,
se va po' a cunsuma'
'a "festa del papà".

Alberto Iannuzzi 01.03.1993

'A FESTA D'O PAPA' (69)

Ogn'anno
'o calennario,
porta nu juorno
ch'è juorno
assai speciale;
tutt''a famiglia
l'aspetta cu anzietà:
è 'o diciannove 'e marzo
'a festa d''o papà!

Alberto Iannuzzi 01.03.1993