L'ASSILLO (142)

Arrivati a 'na cert'età,
faciteve capace
ca ce avita suppurta'!
Forze sarrà 'a vita,
forze sarrà l'età,
ma pe' cagna' 'sti ccose
nun ce 'a putimme fa'!
Simme troppo presente,
simme tropp'assillante,
nunn''o facimme apposta,
è 'a vita ca ce 'o ffa fa'!
Ddoie song''e ccose
ca ce avita perduna':
'o troppo bbene ca ve vulimme
e 'a paura ca ...ce fotte:
l'ammore ce fa penza'
ca v'avimma semp'aiuta',
'a paura ce fa penza'
ca putite sempe sbaglia'!
Nuie che ve spiammo?
Datece 'a libbertà
'e ve pute' ama',
e 'a libbertà pure
'e ce piglia' paura!
Ma si vui penzate
ca simme proprio pazze,
facitece 'a caretà:
nun ce rumpite 'o cazzo!


Alberto IANNUZZI 07.11.2009

'NA CERTA ETA' (141)

Comm'è bella 'a vita ca s'appripara
quanne s'arriva a 'na cert'età;
Quanta premure, quant'accurtenze,
pare quase d'esse' nu prevete all'altare:
Chesto nun t''o magna' ca te fa male,
chello nun t''o bbevere ca nun te fa bbene;
cu quant'ammore te diceno:
famme fa' a me ca tu nun può fa' cchiù,
nun te vesti' accussì ca nun stai bbuono,
quanne magne nun te spurca'
(è overo ca nun te vavie, ma pò pure capita'),
quanne te faie 'o bagno
o stie dint''o ...WC,
nun 'nzerra' mai 'a porta, fa' ca pozze trasi'!
e nun te dico po' si te fai 'a bbarba....
e ancora ciente cose ca nun te fanne fa'!
Ma 'a cosa assai cchiù triste
è quanno cull'aria 'nzista
te diceno "chesto nun ll''e penza'! "
Capisco ca me vulite bbene
e ca 'o ffacite sule pe' mme,
ma si nun pozzo nè vevere nè magna',
si nun pozzo fa' niente si sto' ssulo,
si me trattate peggio 'e nu criaturo,
e pe' ferni' nun pozzo cchiù penza',
diciteme 'na cosa:
che cazzo camp'a ffa'?



Alberto IANNUZZI 09.11.2009

'A LENGUA (144)

E' overo ca l'ammore se legge dint'all'uocchie,
è overo ca diceno cchiù ll'uocchie ca 'e pparole,
è overo ca dice cchiù 'na guardata ca 'na parlata,
ma 'a vocca...che ce sta a ffa'?
Ie penzo ca p'arrapì 'a vocca pe' parla',
pe' dicere chello ca siente dint''o core,
pe' dicere chello ca fai di' surtant'all'uocchie,
pe' dicere chello ca tu vulisse ca 'll'ate capessero
senza ca tu 'llerice niente,
ce vo' 'o curagge 'e nu lione!...
Dicimme 'a verità: si nun vulimme parlà,
è sule pecché ce futtimme d''a paura
p''e risposte ca putimm'avé,
p''e cunseguenze ca ce po' purta'
si nuie arrapimme 'a vocca pe' parla'!
Forze penzammo ca nunn'è ghiusto 'o suffri',
ca nunn'è ghiusto fa' suffri' a chi vulimme bbene
oppure a chi ce vo' nu mare 'e bbene!
Ma chi simme nuie ca pigliamme 'a decisione
'e dicere chello ca è o ca nunn'è ghiusto?
Forze quanno nun se riceno 'e ccose
se pò suffri' cchiù ppoco?
Nunn''o crere, è overo ca 'a lengua
nun ten'osse ma rompe ll'osse,
ma è meglio ave' 'na mazzata 'e lengua
ca ave' 'na ...malatia 'e core!
Pirciò, facimmece curaggio,
parlammo chiaramente
e sbacantamme 'e chistu piso
...'o core!


Alberto IANNUZZI 09.11.2009

'O CAGN''E CASA (138)

Oi ni',
aiere ch'era 'a festa toia,
so' venuto a Carpinone
pe' te purta' a fa'
'na cammenata;
po', doppo nu pare d'ore
simme jute
'ncopp' Sant'Ata!
Proprio 'e faccia 'a cchiesa
d''a Maronna r''a Neve
nce sta nu ciardino
chino 'e sole
e cu 'na vist''e Ddio:
Nerano, Sancustanzo,
Crape e tutt''o riesto,
ca fa arrapi' 'o core
'a fantasia!...
Chesta mo è 'a casa toia,
'na casa chiena 'e sole,
cchiù vicino 'e frate tuie,
a mammà e papà
e ...a nnuie!
Sacce ca chisto
è sulo 'n'indrizzo
addò truove sciure
visite e saluti,
pecché ie sacce pure
ca Tu nun stai llà
ma mmiez'a nnuie!...


Alberto IANNUZZI 28.09.2002

VURRIA (097)

Si tu fusse 'n'auciello
ie vurria esse' nu nivo
pe' te tené 'o ssicuro
dint''o calore 'e 'na casa;
Si tu fusse 'na nave
ie vurria esse' nu puorto
pe' te tené 'o ssicuro
d''e tempeste d''o mare;
Si tu fusse nu sciore
ie vurria esse' nu libbro
pe' te tené stretta dint''e foglie
e astipà tutt''a bellezza toia.
Ma tu si tu
e ie songh'io
e 'a sola cosa ca me fa felice
è chella 'e t'abbraccia'
e t'astregnere 'ncopp''o core
e te da' tutt''o calore e 'ammore
e te tené stretta
tutta e sulo pe' me!


Alberto IANNUZZI 29.11.1992

SURRIENTO (137)

'E Te, paese bello
hanne parlate
puete e scritture,
'e Te cantano ancora
'e cchiù belli ccanzone!
Tu piace a tutte quante,
Tu piace a tutt''o munno,
e tutte veneno ccà
d'Amereca e d''a Cina
pe' Te venì a vede'.
Tutte veneno ccà
e veneno addu Te
e veneno currenno
pe' vede' sul'a Te!
Surriento Surrié!
Si' 'o paese cchiù bello:
'o sole Te vas''a fronte,
'o mare t'anfonn''e piere,
ma 'o core Tuio addo' sta?
'o core Tuio
sta 'mpiett'a nnuie!
Tu sì 'a perla d''o golfo,
'a perla cchiù bella,
'sta perla ca sta a core
a tutt''o munno!
Tutt''e puete cantano
'e Napule 'e ccanzone,
...'anne raggione:
Napule è bella,
Napule è cara,
ma Tu, Surrié
si 'a cchiù bella d''o munno:
'e juorno Tu si' ddoce,
lucida e sblennente
e 'o sole t'accarezza,
'e notte sì rumanteca
c''a luna ca Te culla!

Alberto IANNUZZI 1964