A TOTO' (093-094)

Nè, Totò
nun t''a piglia',
ma ie nun so' d'accordo cu te
ca 'a morte è 'na livella:
si nce penzamme buone,
cu 'a morte
nun se livella niente,
chi campa 'e nuvanta,
'e nuvanta resta
pure doppo muorto,
e chi campa 'a pezzente
tale rummane pure doppo!
Si nce facimme
'na cammenata
pe' dint''e campusante,
nuie, a pprimma vista
e senza leggere 'e marmele,
sapimme vedé
chi è stato signore
e chi è stato pezzente:
chi sta sotto
a nu grande munumento
tu può sta' certo
ca nunn'era nu pezzente!
e chi vicino 'a roce
tene lumine e sciure,
sient'a me,
ce può sta' sicuro
ca pure doppo muorto
nce sta chi 'o cura!
Ma verenno 'na roce
scura, triste e abbandunata,
puote sta' certo
ca è nu muorto scurdato!
Si 'a morte pe' te
è sempe 'na livella,
tiramme a campà,
ca 'a vita è troppo bella!...

Alberto Iannuzzi 15.01.1992

'A CIORTA (93)

'A jurnata accummenza
'a quanno miette 'e piere 'nterra!
e comme sarra'
dipende tutto d''o fatto
si miette 'nterra primma
'o pere manca o 'o reritto!
Si miette 'nterra primma
'o pere justo,
tutto va' annanze
e fila comm'adda fila';
ma si pe' sbaglio
'nterra miette primma
'o pere stuorto,
giurace ca tutt''o juorno
deritto nun po' ghì!...
Accummienze cu 'o ccafè:
o t''o butte 'ncuollo
o te cuoce 'a vocca;
facennete 'a bbarba
certamente te 'ntacche;
quanno iesce d''a casa
e accummienze 'o calvario,
nun vide ll'ora
ca fernesce 'a jurnata,
ca fa notte all'istante
e te vaie a cucca'...
.....
Quanne te scite 'a matina,
aspetta nu poco,
nun scennere 'e pressa,
preia primma 'a Maronna
ca chillo ca miette 'nterra
è 'o pere iusto
e no chillu stuorto!
...o ca si no'..........


Alberto Iannuzzi 12.01.1992

'O DUBBIO (032)

Poco sott''e cinquant'anne
e ancora nun saccio
si aggia crerere
o a chi aggia crerere!
D''e pulitece?
nunn''e parla';
dell'amice?
nun ce penza';
d''e pariente?
scanzace tu;
ma, allora
a chi se po'?
...penzannece bbuono,
nu dubbio m'assale:
fa' ch'avevo raggione
quann'ero criaturo,
e,...'a cicogna,
e,...'a bbefana,
e,...'o ciuccio ca vola,
so' mo realtà?

Alberto Iannuzzi 25.12.1992

'O CORE GUAGLIONE (035)

So' tant'anne
ca simme 'nzurate,
so' tant'anne
ca 'nce amamme accussì;
pass''o tiempo
ma l'ammore nun passa,
e, ogni ghiuorno
se fa sempe cchiù gruosso.
Ogni tanto tu me dice:
ie so' vecchia,
ogni tanto
ce penzo pur'io,
ma po' dico
nunn'è overo, me sbaglio:
simme sempe guagliune
tutt''e dduie!
Forze 'a pelle
nunn'è cchiù comm'a primma,
so' nu poche ianchiate 'e capille,
ma 'sti core,
...e chesto è importante,
so' guagliune
comm'erano tanne!

Alberto Iannuzzi 22.09.1991

PARIENTE A VITA (90)

Tu ll'amice t''e sciglie
e si po'
nun te danne crianza,
nu saluto
...e se scioglie 'a paranza!
'E pariente, però,
so' 'n'ata cosa:
nun t''e sciglie
ma te veneno date,
tu t''e truove
'nfamiglia pe' forza,
e, comm'agge capite,
nu saluto nun basta:
'e pariente so' a vita!..

Alberto Iannuzzi 15.10.1992

'A PACIENZA (89)

Certo ca 'o Pataterno
n'adda tene' pacienza
p'accuntenta' tutt''e crestiane
ca stanne 'ncopp''a terra:
chi 'a vo' cotta
e chi 'a vo' crura;
fa' cavere, e "quanno refresca";
fa' friddo e "quanno scarfa";
sta 'o sole e "quanno chiove";
chiove e "addo' sta 'o sole";
è notte, e "quanno arbéa";
è ghiuorno, e "quanno scura";
chi è chiatto vo' esse sicco,
chi è sicco vo' esse chiatto;
Chi è luongo vo' esse curto,
e chi è curto vo' esse luongo;
'o puveriello vo' 'e denare,
'o ricco nun vo' 'e penziere!
.....
Quanno nasciarrà
nu crestiano cuntento,
sarrà 'a fine d''o munno:
DDio se scucciarrà
e a fa' 'nculo a tutte quante
'nce mannarrà!...

Alberto Iannuzzi 18.09.1991

'A CARTULINA (88)

'A cartulina è 'na veduta
pigliata da luntano
pe' da' 'n'impressione
'e chesta città!
'o mare è pulito,
'o cielo è turchino,
'e ccase so' belle,
'e vvie so' felice!
Si viene vicino
a chesta città
e pitte nu poco
'a vita ca ce sta:
tu vide ca 'o mare
nunn'è cchiù lucente,
tu vide ca 'o cielo
è cupo e pesante,
tu vide ca 'e ccase
so' chiene 'e patenze,
tu vide ca 'e vvie
so' sule apparenza!
chi guarda 'sta foto
'e chesta città,
e penza a 'e crestiane
ca viveno llà
'e chiamma "beati"
e nun penza cchiù 'e llà!

Alberto Iannuzzi 17.09.1991