'A LENGUA (144)

E' overo ca l'ammore se legge dint'all'uocchie,
è overo ca diceno cchiù ll'uocchie ca 'e pparole,
è overo ca dice cchiù 'na guardata ca 'na parlata,
ma 'a vocca...che ce sta a ffa'?
Ie penzo ca p'arrapì 'a vocca pe' parla',
pe' dicere chello ca siente dint''o core,
pe' dicere chello ca fai di' surtant'all'uocchie,
pe' dicere chello ca tu vulisse ca 'll'ate capessero
senza ca tu 'llerice niente,
ce vo' 'o curagge 'e nu lione!...
Dicimme 'a verità: si nun vulimme parlà,
è sule pecché ce futtimme d''a paura
p''e risposte ca putimm'avé,
p''e cunseguenze ca ce po' purta'
si nuie arrapimme 'a vocca pe' parla'!
Forze penzammo ca nunn'è ghiusto 'o suffri',
ca nunn'è ghiusto fa' suffri' a chi vulimme bbene
oppure a chi ce vo' nu mare 'e bbene!
Ma chi simme nuie ca pigliamme 'a decisione
'e dicere chello ca è o ca nunn'è ghiusto?
Forze quanno nun se riceno 'e ccose
se pò suffri' cchiù ppoco?
Nunn''o crere, è overo ca 'a lengua
nun ten'osse ma rompe ll'osse,
ma è meglio ave' 'na mazzata 'e lengua
ca ave' 'na ...malatia 'e core!
Pirciò, facimmece curaggio,
parlammo chiaramente
e sbacantamme 'e chistu piso
...'o core!


Alberto IANNUZZI 09.11.2009

'O CAGN''E CASA (138)

Oi ni',
aiere ch'era 'a festa toia,
so' venuto a Carpinone
pe' te purta' a fa'
'na cammenata;
po', doppo nu pare d'ore
simme jute
'ncopp' Sant'Ata!
Proprio 'e faccia 'a cchiesa
d''a Maronna r''a Neve
nce sta nu ciardino
chino 'e sole
e cu 'na vist''e Ddio:
Nerano, Sancustanzo,
Crape e tutt''o riesto,
ca fa arrapi' 'o core
'a fantasia!...
Chesta mo è 'a casa toia,
'na casa chiena 'e sole,
cchiù vicino 'e frate tuie,
a mammà e papà
e ...a nnuie!
Sacce ca chisto
è sulo 'n'indrizzo
addò truove sciure
visite e saluti,
pecché ie sacce pure
ca Tu nun stai llà
ma mmiez'a nnuie!...


Alberto IANNUZZI 28.09.2002

VURRIA (097)

Si tu fusse 'n'auciello
ie vurria esse' nu nivo
pe' te tené 'o ssicuro
dint''o calore 'e 'na casa;
Si tu fusse 'na nave
ie vurria esse' nu puorto
pe' te tené 'o ssicuro
d''e tempeste d''o mare;
Si tu fusse nu sciore
ie vurria esse' nu libbro
pe' te tené stretta dint''e foglie
e astipà tutt''a bellezza toia.
Ma tu si tu
e ie songh'io
e 'a sola cosa ca me fa felice
è chella 'e t'abbraccia'
e t'astregnere 'ncopp''o core
e te da' tutt''o calore e 'ammore
e te tené stretta
tutta e sulo pe' me!


Alberto IANNUZZI 29.11.1992

SURRIENTO (137)

'E Te, paese bello
hanne parlate
puete e scritture,
'e Te cantano ancora
'e cchiù belli ccanzone!
Tu piace a tutte quante,
Tu piace a tutt''o munno,
e tutte veneno ccà
d'Amereca e d''a Cina
pe' Te venì a vede'.
Tutte veneno ccà
e veneno addu Te
e veneno currenno
pe' vede' sul'a Te!
Surriento Surrié!
Si' 'o paese cchiù bello:
'o sole Te vas''a fronte,
'o mare t'anfonn''e piere,
ma 'o core Tuio addo' sta?
'o core Tuio
sta 'mpiett'a nnuie!
Tu sì 'a perla d''o golfo,
'a perla cchiù bella,
'sta perla ca sta a core
a tutt''o munno!
Tutt''e puete cantano
'e Napule 'e ccanzone,
...'anne raggione:
Napule è bella,
Napule è cara,
ma Tu, Surrié
si 'a cchiù bella d''o munno:
'e juorno Tu si' ddoce,
lucida e sblennente
e 'o sole t'accarezza,
'e notte sì rumanteca
c''a luna ca Te culla!

Alberto IANNUZZI 1964

'A LACREMA E 'A RESELLA (18)

Nu iuorno
dduje cumpagnielle 'e core,
tutt''e dduje figlie
'e belli sentimiente,
pazziavane senza sosta
dint''o ciardino:
abballavano e currevano
facenne 'a gara
a chi arrevava primma
'nfacc''e nnammurate,
'nfacc''e ccriature,
'nfacc''e surdate
e 'nfaccia 'a tutt''a ggente
'e tutte ll'età!
'Na vota venceva uno,
'n'ata vota l'ato...
Stanche 'e chistu juoco,
penzaiene '0e jucà
a "nascondino":
nu poco cuntava uno,
nu poco ll'ato...
'O juoco aruraje poco,
uno dicette all'ato:
"Cu tte nun ghioco cchiù
pecché 'a 'stu juoco
vince sempe tu,
tu si 'a lacrema
e t'annascugne buono arete a me
e io ca so' 'a resella
nunn''o pozze fa' cu te!"

Alberto Iannuzzi 08.04.2010

'A LUNA (040)

Si! ...'a luna!
Sposa d''o sole
ca nun vere maje:
'o ver'asci'
quann'essa s'arretira,
e po' add'asci'
quann'isso s'arreposa...
...che vita 'nfama!...
Eppure 'a Luna
è 'o simbolo 'ell'ammore
e ajuta a tutt''e 'nnammurate:
e 'll'appripara
'o cielo chino 'e stelle,
'a striscia 'argiento a mmare,
p''e fa' sta' azzeccate
a core a core.....
Chello ca nun po' fa' essa
'o ffa fa' all'ate!...
...Che ciorta 'ngrata!...


Alberto IANNUZZI 20.06.2010

'O RILLORGIO MIO (130)

Tenghe nu rillorgio bell'assaje,
è antico... è viecchio comm'a me!
Tutt''a vita m'accumpagnate e m''a signate
'e mumente brutte e 'll'attime 'e felicità;
è bello e nge songhe affezziunato,
..è uno 'e chille ca perfino
nge 'a da' 'a corda ogne matina!
L'auso pe' nu poco e po' l'astipo,
l'auso ancora e 'o torno a l'astipa'!
...po' si' venuta Tu, l''e visto e t'è piaciuto,
e io, senza t''o ffa' di' 'a siconda vota,
l'agge levato e Te l'aggio prestato....
Nun t'aggio vista cchiù pe' tutt''o tiempo,
t'agge chiammata, t'aggio cercata, ma...niente!
Po' all'intrasatta T'agge 'ncuntrata, e Tu,
senza nemmanche me guarda' 'int'all'uocchie,
m'e date 'stu rillorgio dint''e mmane dicenneme:
" nun cammina cchiù " ...e si' sparuta!
L'agge guardate, girate e po' avutate e agge capito ca:
Tu aje tirato tropp''a corda ... e s'è fermato!.....
'A raggiona e 'o sentimento, mai comm''a mo' d'accordo,
me l'anno dato dint''e mmane dicenneme:
nunn''o 'rrapi', ... astipale accussì!......
e mo' 'e vedé l'ora nun me 'mporta cchiù,
ma si proprio 'o vvulesse sape',
guardo 'e stelle e guard''o sole,
e accussì sacce pure che or'è!...


Alberto Iannuzzi 24 marzo 2010