A TOTO' (093-094)

Nè, Totò
nun t''a piglia',
ma ie nun so' d'accordo cu te
ca 'a morte è 'na livella:
si nce penzamme buone,
cu 'a morte
nun se livella niente,
chi campa 'e nuvanta,
'e nuvanta resta
pure doppo muorto,
e chi campa 'a pezzente
tale rummane pure doppo!
Si nce facimme
'na cammenata
pe' dint''e campusante,
nuie, a pprimma vista
e senza leggere 'e marmele,
sapimme vedé
chi è stato signore
e chi è stato pezzente:
chi sta sotto
a nu grande munumento
tu può sta' certo
ca nunn'era nu pezzente!
e chi vicino 'a roce
tene lumine e sciure,
sient'a me,
ce può sta' sicuro
ca pure doppo muorto
nce sta chi 'o cura!
Ma verenno 'na roce
scura, triste e abbandunata,
puote sta' certo
ca è nu muorto scurdato!
Si 'a morte pe' te
è sempe 'na livella,
tiramme a campà,
ca 'a vita è troppo bella!...

Alberto Iannuzzi 15.01.1992

'A CIORTA (93)

'A jurnata accummenza
'a quanno miette 'e piere 'nterra!
e comme sarra'
dipende tutto d''o fatto
si miette 'nterra primma
'o pere manca o 'o reritto!
Si miette 'nterra primma
'o pere justo,
tutto va' annanze
e fila comm'adda fila';
ma si pe' sbaglio
'nterra miette primma
'o pere stuorto,
giurace ca tutt''o juorno
deritto nun po' ghì!...
Accummienze cu 'o ccafè:
o t''o butte 'ncuollo
o te cuoce 'a vocca;
facennete 'a bbarba
certamente te 'ntacche;
quanno iesce d''a casa
e accummienze 'o calvario,
nun vide ll'ora
ca fernesce 'a jurnata,
ca fa notte all'istante
e te vaie a cucca'...
.....
Quanne te scite 'a matina,
aspetta nu poco,
nun scennere 'e pressa,
preia primma 'a Maronna
ca chillo ca miette 'nterra
è 'o pere iusto
e no chillu stuorto!
...o ca si no'..........


Alberto Iannuzzi 12.01.1992

'O DUBBIO (032)

Poco sott''e cinquant'anne
e ancora nun saccio
si aggia crerere
o a chi aggia crerere!
D''e pulitece?
nunn''e parla';
dell'amice?
nun ce penza';
d''e pariente?
scanzace tu;
ma, allora
a chi se po'?
...penzannece bbuono,
nu dubbio m'assale:
fa' ch'avevo raggione
quann'ero criaturo,
e,...'a cicogna,
e,...'a bbefana,
e,...'o ciuccio ca vola,
so' mo realtà?

Alberto Iannuzzi 25.12.1992

'O CORE GUAGLIONE (035)

So' tant'anne
ca simme 'nzurate,
so' tant'anne
ca 'nce amamme accussì;
pass''o tiempo
ma l'ammore nun passa,
e, ogni ghiuorno
se fa sempe cchiù gruosso.
Ogni tanto tu me dice:
ie so' vecchia,
ogni tanto
ce penzo pur'io,
ma po' dico
nunn'è overo, me sbaglio:
simme sempe guagliune
tutt''e dduie!
Forze 'a pelle
nunn'è cchiù comm'a primma,
so' nu poche ianchiate 'e capille,
ma 'sti core,
...e chesto è importante,
so' guagliune
comm'erano tanne!

Alberto Iannuzzi 22.09.1991

PARIENTE A VITA (90)

Tu ll'amice t''e sciglie
e si po'
nun te danne crianza,
nu saluto
...e se scioglie 'a paranza!
'E pariente, però,
so' 'n'ata cosa:
nun t''e sciglie
ma te veneno date,
tu t''e truove
'nfamiglia pe' forza,
e, comm'agge capite,
nu saluto nun basta:
'e pariente so' a vita!..

Alberto Iannuzzi 15.10.1992

'A PACIENZA (89)

Certo ca 'o Pataterno
n'adda tene' pacienza
p'accuntenta' tutt''e crestiane
ca stanne 'ncopp''a terra:
chi 'a vo' cotta
e chi 'a vo' crura;
fa' cavere, e "quanno refresca";
fa' friddo e "quanno scarfa";
sta 'o sole e "quanno chiove";
chiove e "addo' sta 'o sole";
è notte, e "quanno arbéa";
è ghiuorno, e "quanno scura";
chi è chiatto vo' esse sicco,
chi è sicco vo' esse chiatto;
Chi è luongo vo' esse curto,
e chi è curto vo' esse luongo;
'o puveriello vo' 'e denare,
'o ricco nun vo' 'e penziere!
.....
Quanno nasciarrà
nu crestiano cuntento,
sarrà 'a fine d''o munno:
DDio se scucciarrà
e a fa' 'nculo a tutte quante
'nce mannarrà!...

Alberto Iannuzzi 18.09.1991

'A CARTULINA (88)

'A cartulina è 'na veduta
pigliata da luntano
pe' da' 'n'impressione
'e chesta città!
'o mare è pulito,
'o cielo è turchino,
'e ccase so' belle,
'e vvie so' felice!
Si viene vicino
a chesta città
e pitte nu poco
'a vita ca ce sta:
tu vide ca 'o mare
nunn'è cchiù lucente,
tu vide ca 'o cielo
è cupo e pesante,
tu vide ca 'e ccase
so' chiene 'e patenze,
tu vide ca 'e vvie
so' sule apparenza!
chi guarda 'sta foto
'e chesta città,
e penza a 'e crestiane
ca viveno llà
'e chiamma "beati"
e nun penza cchiù 'e llà!

Alberto Iannuzzi 17.09.1991

DENARE E DITTE ANTICHE (87)

" 'E denare fanne veni'
'a vista 'e cecate".
"C'est l'argent
qui fait la guerre".
"Senza denare
nun se cantano messe".
Chiste so' ditte
'e tutt''o munno
ca tutte diceno
quanno..."chiagneno".
Pure si ie crere
a tutt''e ditte antiche,
a chiste nun se po':
'O munno è chino 'e guerre
e, denare nun ce ne stanne!
'e cecate so' cchiù poche
e, simme tutte puverielle!
Tutt''e iuorne dint''e cchiese
so' messe cantate a tutte l'ore:
vanne pe' copp''e cannucce,
oppure chi 'e pave?
ddoie songh''e cose:
o so' faveze 'e ditte,
o simme buciarde nuie!

Alberto Iannuzzi 15.09.1991

'E DENARE E 'E CECATE (86)

Nunn'è overo
ca 'e denare
fanne veni'
'a vista
'e cecate,
ma ll'aiutano assaie
a senti' meno
'o peso d''a vita!

Alberto Iannuzzi 26.01.1993

DOPPO CARNUVALE (83)

- Nennì, sosete ch'è tarde,
- Mammà, nunn'è ccosa,
- Nennì, Tu 'i a 'i 'a scola,
- Mammà, so' stracche
me gir''a capa,
me tremmane 'e ccosce
e tenghe suonno,
cchiù tarde, mammà!
- Nennì, Carnuvale è passate,
ogge è 'n'atu iuorno,
'a scola sta lla',
e nun te fa' aspetta'!
'A fine 'o ninno se sose,
piglia 'e libbre e va 'a scola:
'o piglia 'a paura,
nun sap''a lezzione,
è stracche
e tene suonno
e nunn'ave sturiato...
Ma nun sape, 'o puveriello,
ca 'e prufessure
stanne pegge d'isso
e ca nun vedeno l'ora
ca sona 'a campana
pe' ghi' a durm' nu poco
...'ngrazzia 'e Ddio!...

Alberto Iannuzzi 03.03.1965

CARNUVALE (135-136)

Ogn'anno cagn''a data
ma si' semp''o stesso,
sempe c''allerìa
sempe c''a cuntentezza!
'E piccirille
se vesteno 'angiulille,
cuniglie o riavulille,
oppure 'a scegnetelle;
'e cchiù gruosse
penzane d'essere caw-boys,
Bufalo o Pecos Bill,
Zorro o Jessie James,
cu maschere e cappielle
pistole e stivalune,
vonne fa' 'a 'uerra
e accirere ll'indiane:
'E curiandele volano,
'e bbotte 'ncapa
cu 'e manganielle 'e gomma;
e, 'e pazzìe ca se fanno
nun se contano cchiù.
Po' passano p''a sfilata
'e carre mascherate:
'o missile ca parte
e 'll'ate stanne 'nterra
cu 'e facc''e fesso!
Po' Pass''a nave e 'uerra,
cu 'e pirate bendate,
cu 'a coscia 'e ligno
e 'o 'ncino 'mmano!
Tutte rireno,
tutte alluccano,
ma non tutt''e core
stanne 'nfesta:
'o vicchiariello
penza 'e tiempe passate
cu 'a maschera 'Arlecchino,
cu Pullecenella e Culumbrina,
ieve a passa' 'a serata
cu nu becchiere 'e vino,
mo, n''o po' ffa' cchiù,
è viecchie e 'o tiempe passa,
lasciate 'o pass''e ggiuvane
ca s'anna deverti'!
'A sera, 'o ball'in maschera
zompano e rireno,
abballano e beveno...
Ma 'mpont''a mezannotte
careno 'e maschere
e po' fernesce 'o sfizio,
s'accummenza a penza' a dimane
ca nunn''è chiù Carnuvale
e, s''adda fateca'!....

Alberto Iannuzzi 03.03.1965

COMM'A NU SPECCHIO (66)

Ie so' comm'a nu specchio,
tutto chello ca vide
è chello ca me daie;
si me vene 'ncuollo
nu ragg''e sole
sulo nu ragg''e sole io do!
S'ie veco dduje uocchie triste,
sule chille te pozze fa' vede';
si me daie nu vaso
chillo ie te torno a da';
si 'o bbene faie vede'
'o bbene te torna,
ma si 'o mmale me vuo' da',
cchiù 'e chello nun te po' turna'!
Cerca 'e me guarda'
cu nu pizz''a riso
ca 'allerìa te voglio da'!
Ma si nun si' cuntenta
'e chello ca te do'
...e me vulisse scassa':
io so' bell'e caro, 'o ssaje,
ma si me scasse
...so' guaie!


Alberto Iannuzzi 24.11.2009

'A DECISIONE (081-082)

Songo 'n'armatore
'e vastemiente,
...veramente
ne tenghe un sule!
...ma è bello e forte
e ten''o mare
ch''è 'na maraveglia!
P''o passate quacche paura
pure me l''a date,
paricchie vvote,
dint''a tempesta,
agge mannato l'S.O.S.,
ma pe'...furtuna
e cull'aiute 'e DDio
sempe 'mpuorto m''a purtate!
'Stu bellu vastemiento
'a sempe tenute me
pe' cumandante,
'n'equipaggio 'e fuoco
e 'na ciurma
ca 'e soddisfazzione soje
pure m''a date!
Agge capito mo'
ca 'o ruolo mio
è chillo 'e fa l'armatore;
'a nave è tosta,
l'equipaggio è buono,
e 'a ciurma non di meno.
Pe' fa' viaggia'
'stu bellu vastemiento,
senza pericule,
senza ghì 'a deriva
e pe' vedé sempe
'o puorto cchiù sicuro,
'nce vo' nu cumandante
cu...'a "C" maiuscola!
.......
Cu 'e cunziglie 'ell'amice
ecu 'a pace de "LA VERNA",
agge truvato
chello ca fa pe' mme:
'Nu vero lup''e mare,
'o padrone d''e tempeste,
'o cielo, 'o mare, 'a terra
so' criature soje;
'o primme cumandante
'e tutt''e mare,
'o meglie d''e meglie,
anzi, pe' di' la verità:
.........."L'UNICO".........
L'agge purtate 'ncopp''a nave,
l'agge presentate l'equipaggio,
tutte 'll'ufficiale
e tutt''a ciurma,
''ll'agge date dint''e mmane
'a rota d''o temmone
e 'll'agge ritte:
...FA' TU! ...
Stamme tutt'a disposizziona Toia,
mo, 'o Cumandante si' Tu!...
...........
Forze v'agge nu poco 'ncuriosite?
vulisseve sape' 'o nomme 'e chesta nave?
vulisseve sape' 'o nomme d''o Cumandante?
embe', mo' v''o dich'io:
'stu vastemiento se chiamma
" CORE MIO "
e 'o Cumandante se chiamma
......" DDIO "!.......

Alberto Iannuzzi 30.08.2002

'A NASCITA (80)

Oggi è 'a festa toja,
quant'anne faje?
Te si' fermato sett'anne fa'
e 'a tanne,
cchiù nun se ponne cunta'!
Tropp'ambresse te ne si' ghiuto
e, 'a chillu juorno
tiene semp''a stess'età,
e chell'è pe' ll'eternità!
Tu ca mo staje 'a lla'
e tutt''e ccose vide,
aiutame a campà,
famme nu poco 'a guida:
s'ie vache p''a via storta
fermame pur''o pere,
s'ie facce quacche sbaglio
tirame p''o guinzaglio,
tieneme p''a mana
e guida nu poco Tu,
famm''ì p''a via deritta
nun me fa' scantuna'!...
Pe' me staie sempe cca',
staie sempe 'mmiez''a nnuje,
stie 'n viaggio cu 'll'amice
e cu' mammà e papà!...

Alberto Iannuzzi 23.09.1991

'O CORE E 'A CAPA (42)

'A capa me dice:
cagna' 'a via vecchia p''a nova
se sa' chello ca se lascia
ma nun sa' chello ca se trova!
'O core risponne:
acqua ca nun cammina
fa' pantano e fète!
Pe' sta' bbuono
me dice 'a capa:
a tavola lieve 'o ssale,
'o ppane, 'o cundimento ardìto,
'o zuccaro 'o bbevere e l'alcool;
'o core me mett'annanze
maccarune c''o rraù,
sacicce e friarielle,
vino bbuono, cafè e babbà;
'a capa m'appripara
'ncopp''o lietto
'o doppiopetto, 'a cravatta,
scarpe 'e vernicia nera e 'o paletot;
'o core, invece,
nu jeans e 'na maglietta
e, 'a scaveza pe' senti' tuio
'o munno sott''e piere...
....
Certo ca nunn'è semplice 'e scegliere
si se vo' vivere 'a vita
o si s''a vo' campa'....
si se magna pe' vivere
o si se vive pe' magna'!
è overo:
'o troppo stroppia,
...ma 'a vita è una sola!....

Alberto Iannuzzi 19.10.2008

'O 'MBRELLO (091-092)

E' 'na jurnata 'e fuoco,
nu cavere ca te fa 'mpazzi',
nu sole ca spacca 'e pprète,
n'abbafuogno ca nun te fa ciata',
l'ummeto ca te s'azzecca 'ncuollo!..
'A nu mument'a 'n'ato,
'o cielo se fa niro,
se vereno 'a luntano
lampe e saette
ca sguarrano
'e nuvulune nire
dint''o cielo!
Sarra' 'na trubbéa?
nu tempurale estivo?
...Scenne l'acqua a zeffunno;
nu tempurale accussì
manch''a vernata!
Cirche 'e t'arriparra',
cirche nu 'mbrello,
...ma nunn''o truove;
'stu cagnamiento 'e tiempo
certo nun t''o 'spettave
e nun putive mai penza'
'e scennere cu 'o 'mbrello!...
...
'A vita scorre liscia
senza 'ntuppe
e senza niente ca t'avvilisce;
po', 'a nu mument''a 'n'ato
'na mazzata dint''a noce d''o cuollo,
'na mancanza 'e denare,
nu mal''e cape o 'na malatìa,
nu prubblema 'e famiglia,
e subbeto chiammammo
pe' 'n'aiuto 'o Pataterno!
Addenucchiate dint''a cchiesa
'o priammo cu' passione
cu 'e llacreme all'uocchie!
...'nce rammaricammo
ch''a grazzia nunn'arriva,
ca nun ce fa 'o miraculo,
ca nun sta a ssentere
tutt''e preghiere noste,
e ca 'o prubblema
nun trova soluzzione!...
Nun putimme ave' 'a pretesa
ca Isso sta a disposizzione nosta....
Proprio comm''a quanno
dint''a trubbéa
cercavemo 'o 'mbrello
...ca nun ce steva!...

Alberto Iannuzzi 16.07.2002